Солтүстік Қазақстан облысы Қызылжар ауданы Петерфельд ауылындағы Қызылжар Абай орта мектебі директорының ғылыми-әдістемелік жұмыс бойынша орынбасары. Назарбаев Зияткерлік мектептері жүйесінде біраз жыл еңбек етіп, әлемдік стандарттарға сай білім беру тәжірибесін жинақтаған жоғары санатты ұстаз. Педагогикалық еңбек өтілі - 43 жыл. Қарағанды мемлекеттік университетінің 1986 жылғы түлегі. Мамандығы – қазақ тілі мен әдебиеті пәні мұғалімі. Еңбек жолын ауыл мектебінің мұғалімі қызметінен бастап, кейін облыстық педагог кадрлардың біліктілігін арттыру жүйесінде көп жыл еңбек етті.
1997-2010 жылдар аралағында Солтүстік Қазақстан облыстық біліктілік арттыру институтында (кейін «Өрлеу» БАҰО ) әдіскер, аға оқытушы қызметін атқара отырып, облыс ұстаздарына әдістемелік қолдау жасау жұмысын жетілдіруге зор үлес қосты. Осы жылдары солтүстік өңірде мемлекеттік тілді дамытуға ісіне белсенді араласты. Мемлекеттік тілді дамыту мәселелері бойынша телебағдарламаларға сұхбат беріп, жергілікті баспа беттерінде проблемалық мақалалар жариялап отырды. Институт қабырғасында еңбек еткен уақыт аралығында екі авторлық іс-шараның ережесін дайындап, жүйелі түрде өткізіп жүрді. Олар: орыс тілінде білім беретін мектептерде оқып жатқан қазақ балалары үшін қазақ тілі мен әдебиеті пәні бойынша «Мұрагер» олимпиадасы және ұлты орыс ұстаздар үшін қазақ тілінде «Интеллектуалдық турнир» атты байқау.
2009-2013 жылдар аралығында Петропавл қаласындағы қалалық классикалық гимназияның директоры, кейін облыстық ақпараттық технологиялар және әдістемелік жұмыс орталығының директоры қызметін атқарды.
Қайнетова Гүлдарай Құрмашқызы – Назарбаев Зияткерлік мектептері жүйесінде педагогтардың кәсіби дамуына қолдау жасау жұмысы бойынша сертификаттаудан өткен тренер. Сонымен қатар біліктілік арттырудың Деңгейлік бағдарламалар ( 3 деңгей) тренері.
Соңғы жылдардағы кәсіби даму бағыты – білім алушылардың зерттеушілік қабілетін дамыту арқылы білім сапасын жетілдіру. Оқушылары Республикалық, желілік, облыстық зерттеу жобалары байқауларының жеңімпаздары мен жүлдегерлері болды. Сыни тұрғыдан ойлауды дамыту мәселесі бойынша әріптестерімен бірлесіп, тәжірибедегі зерттеулер жүргізді.
Гүлдарай Құрмашқызының еңбек жолы туралы очерк «Северный Казахстан» баспасы дайындап шығарған «Имена в истории. Северный Казахстан» атты жинаққа (10 том) және Солтүстік Қазақстан облыстық тарихи-өлкетану мұражайы жанындағы «Асыл мұра» орталығы дайындап шығарған «Солтүстік Қазақстан облысының зиялы қауым өкілдері» атты жинаққа (7 том) енді.
Қайнетова Гүлдарай Құрмашқызының білім саласына сіңірген еңбегі мемлекет тарапынан жоғары бағаланып, «Қазақстан Республикасы Тәуелсіздігінің 20 жылдығы» медалімен және «Ыбырай Алтынсарин» төсбелгісімен марапатталды.
Гүлдарай Құрмашқызы отбасында өзін бақытты жан деп есептейді. Жары Біркенов Ерсін Серкеұлы екеуі екі ұл тәрбиелеп өсірді. Ерсін Серкеұлы түзету мекемесінде бөлім басшысы. Ұлдары парасатты, білімді, тәрбиелі және іскер азаматтар болып өскеніне шексіз разы. Үлкен ұлы Жасын Біркенов-журналист. «Хабар» агенттігінде «24 KZ» арнасының тілшісі. Кіші ұлы Ботахан Біркенов – жеке кәсіпкер.
